यस भल् जै के हूँ पै!
रचनाकार: हीरा बल्लभ पाठक
पड़ोसक् झगड़
बैरिक् दगड़
भल् जै के हूँ पै?
*
पुराणि दगड़ तकरार
न्यौलि दगड़ प्यार
भल् जै के हूँ पै?
*
मुख पार् चुपड़ि
मन में दुहरि
भल् जै के हूँ पै?
*
भ्यार् हूँ माँछ
भित्येर हूँ स्याप
भल् जै के हूँ पै?
*
कांसक् फूटी भान्
द्याप्तक् उजड़ी थान
भ्योव पारिक् मकान
और उधारैकि दुकान
भल् जै के हूँ पै?
*
द्वी दिनैंकि जिन्नगी
प्रेमैंल् रूंण चैं
ओंतर्याट् फोंतर्याट
भल् जै के हूँ पै?
*
अहो दाज्यु! तुमत् सिद्द मैंस भ्या
बिल्कुल द्यप्त् जस्
म्यर् चारि उजड्ड और सनकी
भल् जै के हूँ पै?
*
इक्वाड़ बल्द, टुटी हौव
खेतम् कुरी बुज
नान्तिन् परदेश
बुड़-बाड़ि उदेखम्
भल् जै के हूँ पै?
🌿🌿⚘🌿🌿⚘🌿🌿हीरावल्लभ पाठक (निर्मल)
स्वर साधना संगीत विद्यालय लखनपुर,रामनगर
हीरा बल्लभ पाठक जी द्वारा फेसबुक ग्रुप कुमाऊँनी पर पोस्ट
0 टिप्पणियाँ