उठ उठ अब उज न गंवा

उठ उठ अब उज न गंवा
छू अन्यार मुछ्याव जवा

(रचनाकार: दिनेश कांडपाल)

पहाड़ क मैंसूंक लिजी कुछ पंक्ति............

उठ उठ अब उज न गंवा

छू अन्यार मुछ्याव जवा

थोड़ि देर में रात ब्यालि
यों अन्यार तब कां र वा

उठ उठ अब उज न गंवा
छू अन्यार त मुछ्याव जवा

अंगवाव अब जोरै कि डाव
आब ऐ बेर थात समाव
मन भीतेर क दुरमुराट्
एक बटैबटि सब निकाव

उठ उठ आब उज न गंवा
छू अन्यार त मुछ्याव जवा

आर पार ट्वल छ जलि
जगनि किड़ थाकनै चलि
इसिकै कां उज्याव होलि
मिलबांटि य रात कट लि

उठ उठ आब उज न गंवा
छू अन्यार त मुछ्याव जवा

रोपि दे खुट बट बटौआ
हारि थाकि बे उज नि आवा
सारि उमर टोलिन रया
आब करंण क बख़त आवा

उठ उठ ब उज न गंवा
छू अन्यार त मुछ्याव जवा

यौं पधान इसिकै रला
घुत्ति में इनरि हमेशा रुंला
बाबू बुबु सब इसिकै खपा
इसिकै हम तुम खपूला

उठ उठ आब उज न गंवा
छू अन्यार त मुछ्याव जवा