गिर्दा का कुमाऊँनी गीत - जैंता एक दिन तो आलो

गिर्दा का कुमाऊँनी गीत - जैंता एक दिन तो आलो

ततुक नी लगा उदेख
घुनन मुनइ नि टेक
जैंता एक दिन तो आलो उ दिन यो दुनी में।1।

जै दिन कठुलि रात ब्यालि
पौ फाटला, कौ कड़ा
जैंता एक दिन तो आलो उ दिन यो दुनी में।2।

जै दिन चोर नी फलाल
कै कै जोर नी चलौल
जैंता एक दिन तो आलो उ दिन यो दुनी में।3।

जै दिन नान-ठुलो नि रौलो
जै दिन त्योर-म्योरो नि होलो
जैंता एक दिन तो आलो उ दिन यो दुनी में।4।

चाहे हम नि ल्यै सकूँ
चाहे तुम नि लै सकौ
मगर क्वे न क्वे तो ल्यालो उदिन यो दुनी में ।5।

वि दिन हम निं हुँलो लेकिन
हम लै वि दिनै हुँलो
जैंता एक दिन तो आलो उ दिन यो दुनी में ।6।

(जैता एक दिन तो आलो : 246 : रचना : 16 सितंबर, 1984)