अमृत जल (कुमाऊँनी कविता)

रचनाकार:  रेणुका जोशी

माघौ म्हैण लाग रौ
प्रयागराज में कौतिक है रौ ।
मोटर कारन कं त भैरै रोकी भै
तीरथ में आछा त पैदलै हिटण भै।

हिटण हिटणै खुट पटैं जानी
यां चै बे मैंस रणीं ज जानी
कस कस स्वांग धरि छन !
कोई घुंघुट करनी कोई नांगडे़ छन।

बाटनाक नौ पढ ल्हिया
हरै जाला त कैधें पुछ ल्हिया।
दगडुवा दगै हाथ झन छोड़या
कौतिक देखन देखनै भबरी झन जाया।
गंगैकि रेत में कसि ज रौनक भैयि
मैस त भया यां साधु लै छाजि रैंयि।

संगम में ना हुं आला
इदु काम कर्या।
गाड़ गद्ध्यारन कं कभै
मैल झन कर्या।
गंग छू यौ हमैरि मै छू
यैक त्वप पिबेर त मोक्ष छू।

नानछिना बै सुणनै ऐ रयूं
गंग में पाणि बगण जालै
जी रया जागि रया
हिमालै में ह्यूं रूण जालै।

जां लै है सकों खूब बोट लगाया
आपुण धर्ती मै कं हर्याल ज छजाया।
अघिलाक नानतिनां हं
गंगक अमृत बचै जाया।

 रेणुका जोशी जी की यह कविता फेसबुक ग्रुप कुमाऊँनी शब्द सम्पदा से ली गयी है।

[[ रेणुका जोशी जी की सभी पोस्ट देखें ]]