पट्यूड़/पातरा
कुमाऊँनी खान-पान की रैसिपी
प्रस्तुति: सुमीता प्रवीण
पट्यूड़/ पातरा ( कुमाऊंनी)
समान (सामग्री):-
9 पात गाबाक
आधु किलो बेसण
हल्द, लूंण, लाल खुश्याणि, चिन (शक्कर) सवाद हिसाबेल
तीन डाड़ मूंगफली तेल
एक लिम्बू
राई, सफेद तिल बघार लीजि
तरिक (बनाने की विधि):-
गाबाक पातन कें भली के साफ, ध्वे सूखा भेर राख दियो।
बेसण में एक डाढ तेल, हल्द,लूंण, लाल खुश्याणि,चिन, लिम्बू डाल भेर खूब भली के मिस ल्यो।
ज्यादा पतव झन बनाया।
लापसी जस वीक टेक्स्चर हुन चैं।
ठुल्ली थाय उल्ट कर भेर गाबाक पातन कें ले उल्ट कर राखो।
अब वीमे बेसणक घोल भली के लपटा दियो वी मथोल में दोहर पात धरो।
वीमे ले उसीके घोल लगावो।
तिहर पात ले उसी के धर भेर घोल लगावो।
सब्ब तरफ बेटी घोल लगा भेर गोल गोल मोड़ो।
छलनी में तेल चुपड़ भेर उमे तीन -तीन कर बणाई हुई पट्यूड़ कें धरो।
अब गर्म पाणिक डेक में भाप लगा भेर 15 मिनिट तलक ऊश्यूंण दियो।
ठंड कर भेर गोल गोल काट लियो।
तेल गरम करो वीमे राई, तिलक बधार करो।
अब कटि हुई पट्यूड़न में डाल भेर भली के हिला ल्यो ताकि बघार भली के सबन में लाग जावो।
क्वे लोग तेल में पकौड़ी जस तल भेर ले खनी।
नोट-
पट्यूड़ पहाड़ में थोड़ अलग रीतेल बन्युनि मश्याल में फेर हुन्छ।
पर यो तरीक ले भल हुन्छ।
गौं में चौमास में हुनि पर शहरों में हमेशा पाई जनि।
मश्याल जतुक कम हुनी उतुक भल हुनी प्योर पहाड़ी व्यंजन।
सुमीता प्रवीण, मुंबई, August 03, 2021
सुमीता प्रवीण जी द्वारा फेसबुक ग्रुप उत्तराखंड रसोई विज्ञान पोस्ट से साभार
0 टिप्पणियाँ