ऐ गो चैतक् म्हैंण
(रचनाकार: घनानन्द पाण्डे 'मेघ')
ऐ गो चैतक् म्हैंण,
ऐजा मैत ऐजा बैंण।
ऋतु बसन्त नौर्त जात्,
घ्यूक पुवा इजुक् हात्।
द्याप्ता है जाल दैण,
ऐजा मैत ऐजा बैंण।
बुरांस फुल्या सरसों फुली,
डानन् वासा कफुवा न्यौलि।
आम सुणालि ऍण,
ऐजा मैत ऐजा बैंण।
फुल देलिक् ह्वल त्यार,
खीर खांणांकि ह्वलि बहार
तू डालली ऐपंण,
ऐजा मैत ऐजा बैंण।
बैणि छ एकलि,
काम कसिक्यै द्यखलि।
भौ बोलां लटैंण,
ऐजा मैत ऐजा बैंण।
मैक् हाताक् लगड़ खाली,
उनरि मुखड़ि चै जाली।
हम दगैड़ा गैंण,
ऐजा मैत ऐजा बैंण।
घनानन्द पाण्डे 'मेघ'
0 टिप्पणियाँ