म्यर ईजा

*म्यर ईजा*

रचनाकार: भुवन बिष्ट

ईजा तू छै भौत महान, करूं, त्यौर होम गुणगान
कोख में धरि नौ म्हैंणा, करौं कष्ट तिलै पावणा

हाथ पकणि हिटण सिखाई, यौं दुनिं संसार दिखाई
घूरिं बे उठण तिल बताई, भौल मति लै तिल सिखाई

सिखाई ईजा भौल बुलाण, यौ दुनिं में दिई पछाणं
दिई तिलै भौल संस्कार, करौं उज्याव मिटाई अन्यार

पढाई लेखायी ज्ञान बढाई, दूनिं में हामौर मान बढ़ाई
मानवता लै तिल बताई, धरम करम तिलै सिखाई

आपण सुख करि न्यौछार, दुनिं में बणां भौल परिवार
त्यौर कष्टौं के छौं सम्मान, ईजा तू छै भौत महान

हर जन्म त्यौर आंचल मिलों, करूनूं ईजा यैंक आश
आयी कत् सुख दुख लें, बिता कष्ट दिन रात जास

ईजा आशिर्वादैल त्यौर, बढौं हामौर मान सम्मान
ईजा तू छै भौत महान, करनूं त्यौर हांम गुणगान