भादो की गाड़

कुमाऊँनी कविता, भादो म्हैणा गाड़ ऐगे, गाड़ गध्यारन पाणि भरी गो. इस्कूल कसिक्यै जानूं। Kumauni Poem rain drain in Bhado flood

भादो की गाड

(रचनाकार: घनानन्द पाण्डे 'मेघ')

भादो म्हैणा गाड़ ऐगे,
इस्कूल कसिक्यै जानूं।
बौली ग्यान रौड़-भौड़,
इस्कूल कसिक्यै जानूं।।

मैं दी राखै भौत काम,
भ्वल हुनी छ इम्हिान।
परेशान है गयाँ याँ
इस्कूल कसिक्यै जानूं।।

डान-कान अन्यार है गो,
सरग घड़कन पै गो।
हम घर में रै गयाँ याँ,
इस्कूल कसिक्यै जानूं।।

गाड़ गध्यारन पाणि भरी गो.
डान-कान बादल उरी गो।
हम भिजन पै गयाँ याँ,
इस्कूल कसिक्यै जानूं।।

बरखा हौ या पैर पड़ौ,
ह्यूं पड़ौ या मारो पड़ौ।
हम कभै ले नी कूना,
इस्कूल कसिक्यै जानूं।।