चुनावी कहमुकरियां
रचनाकार: ज्योतिर्मयी पंत
कहमुकरी सबन है पैली अमीर खुसरो द्वारा लेखी गयी विधा छू यो। यमें सखी सहेली आपस में यस बात कूनी जो यस लागौं की उ आपुन पति बार में बात करनईं। पर जब उ पूछनी कि को छू यो तेर साजन? तब उ उत्तर में बतूं नै यो दूसर क बार में छू। एक तरह'क पहेली जस रचना में बातचीत हूँ। आज कुमाउनी में चुनावी कहमुकरियां लेखणक प्रयास कर राखौ।
भौत दिनन में वापिस एगो
सब्बुन क मन खूब बहलै गो
बदल रई सब आपूण स्वभाव
को सखि साजन? नै हो चुनाव।
जाग जाग खूब रौनक छै रे
रैली भाषण उपहार बांटी रे
फिर न्हेई जाला वोट समेटा
को सखि साजन? नै हो पार्टी नेता।
अदल बदल को अवसर मिलनो
मतलब देखी पाल बदलनो
टिकट मिलन लिजी जुगत अपार
को सखि साजन? नै हो उम्मीदवार।
सुख भविष्य का स्वैण देखूनो
मुफ्त चीज आशाश्वन दिलोनों
जनता भबरी असमंजस जान
को सखि साजन? नै हो "मतदान।
ज्योतिर्मयी पंत, Oct 10, 2021
फेसबुक ग्रुप "पहरु कुमाउनी मासिक" से साभार
ज्योतिर्मई पंत जी के फेसबुक प्रोफाइल को विजिट करें
0 टिप्पणियाँ