जिम कार्बेट पार्काक् शेर......
रचनाकार: ज्ञान पंत
बेयियै बात
न्हे गे....
आज' कि
खबर कर।
................
रात त
सबनै बानैकि भै....
दिन पत्त नै
कै हा्थ पड़ौं ।
................
तु लाख कर....
बखत
न्है ग्यो त
फिर कभै नि आ।
................
आपण हिसाबलै
सब हुनेर भै.....
तु मनखी छै त
"ढब" बदयि सक्छै।
..................
कचुव पाँणि
बतैं दिंछ ....
कि , पहाड़न में
सब ठीक-ठाक न्हाँ।
..................
मूँख
कब जाँणैं लुकालै....
उड्यार है भ्यार त
ऊँणैं पड़ौल।
...............
मैंस छै त
मैंसना्क जा्स
काम ले करी कर....
नन्तरि
को पुछण लागि रौ
यो दुन्नि में।
..................
कसिक कै सक्छै
कि .....
तु
ज्यूँन छै।
................
मरणाँ लिजी ले
के न के
नेर चैन भै....
खाल्ली
याँ
क्वे नि मरन्।
---------------------------------
बखत'कि बलिहारी छ
पहाड़न में बिहारी छ
उत्तराखंड त बँणि ग्यो
पछ्याँणनेर एक नि भ्यो।
बखत'कि बलिहारी छ
सरकार ले आपणीं छ
एक जो नेता है ग्यो
कभै हा्थ नि लाग्नेर भ्यो।
बखत'कि बलिहारी छ
सड़क बिजुलि ले पुजी छ
आ्ग हालौ बिकासा-ख्वार
बखायि त पुरी खाली ईई छ।
बखत'कि बलिहारी छ
ठेकदार' नैकी चौल छ
नेता दगा्ड़ सल्ला है रौ
तबै पहाड़ ढुँङ में रै रौ।
बखत 'क बलिहारी छ
दुन्नि बज्यूँण ले न्यारी छ
उ त आज न्है ग्यो कूँछा
आ्ब भोल मेरि बारि छ।
--------------------------------
शब्दार्थ:-
बेयियै - कल की,
बानैकि - हिस्से की ,
ढब - चाल / तरीका,
लुकालै -- छुपाओगे,
उड्यार - गुफा,
नन्तरि - वरना,
नेर - बहाना
पच्छयाँणनेर - पहचानने वाला,
चौल - मौज,
सल्ला - सांठगांठ,
ढुँङ में रै रौ - उपेक्षित है,
दुन्नी बज्यूँण - बेकार की दुनियाँ (सही भाव कोई विद्वजन ही बताएंगे)
May 17, 21 2018
...... ज्ञान पंत
ज्ञान पंत जी द्वारा फ़ेसबुक ग्रुप कुमाऊँनी से साभार
ज्ञान पंत जी के फ़ेसबुक प्रोफ़ाईल पर जा सकते हैं
0 टिप्पणियाँ